ವನಸುಮ - ಡಿ. ವಿ. ಜಿ
ವನಸುಮದೊಳೆನ್ನ ಜೀವನವು
ವಿಕಸಿಸುವಂತೆ
ಮನವನನುಗೊಳಿಸು ಗುರುವೇ, ಹೇ ದೇವ ||
ಕಾನನದಿ ಮಲ್ಲಿಗೆಯು,
ಮೌನದಿಂ ಬಿರಿದು ನಿಜ-
ಸೌರಭವ ಸೂಸಿ ನಲವಿಂ
ತಾನ್ ಎಲೆಯ ಪಿಂತಿರ್ದು
ದೀನತೆಯ ತೋರಿ ಅಭಿಮಾನವನು ತೊರೆದು
ಕೃತಕೃತ್ಯತೆಯ ಪಡೆವಂತೆ
ಮನವನನುಗೊಳಿಸು ಗುರುವೇ, ಹೇ ದೇವ ||
ಉಪಕಾರಿ ನಾನು ಎನ್-
ಉಪಕೃತಿಯು ಜಗಕೆಂಬ
ವಿಪರೀತ ಮತಿಯನುಳಿದು
ವಿಪುಲಾಶ್ರಯವನೀವ
ಸುಫಲ ಸುಮಭರಿತ ಪಾದಪದಂತೆ
ನೈಜಮಾದೊಲ್ಪಿನಿಂ ಬಾಲ್ವವೊಲು
ಮನವನನುಗೊಳಿಸು ಗುರುವೇ, ಹೇ ದೇವ ||
